| Referencia: | 003089 |
| Editorial: | Bastiana |
| Ano: | 2022 |
| Lugar de edición: | A Coruña |
| Medidas: | 21x15x1 |
| Páxinas: | 74 |
Tinta Libertaria, Textos Disolventes. Historia do libro anarquista galego
A Galiza libertaria foi un verdadeiro verxel de iniciativas culturais, abranguendo dende a educación infantil e adulta ata a os proxectos editoriais, pasando pola posta en marcha de centros sociais e ateneos, e polo desenvolvemento das máis diversas artes. Entre as iniciativas editoriais o libro obreiro ocupou un lugar salientable. Dende finais do século XIX ata 1936 os anarquistas galegos publicaron arredor de 100 libros, agrupados en media ducia de bibliotecas.
Tras o golpe de estado militar de xullo de 1936 a espiral de violencia despregada polo nacional-catolicismo tivo entre os seus principais propósitos a destrución de todo vestixio material da cultura anarquista do país. A queima dos libros considerados polas novas autoridades como antiespañois e disolventes foi o principal método para desenvolver este culturicidio. Pero todo lume deixa as súas cinzas.
Textos Disolventes é a colección coa que traballamos na recuperación daquela cultura libertaria galega a través dos seus textos por medio de edicións facsimilares. Con este número cero da colección facemos un percorrido histórico polas bibliotecas e publicacións anarquistas galegas. Un punto de partida co que comezar o labor de reedición facsimilar das principais obras que sairon dos prelos libertarios do país.