Pulso de Galicia. Reagrupamento, agregación e conflitividade libertaria na comarca de Vigo (1950-1962)

Pulso de Galicia. Reagrupamento, agregación e conflitividade libertaria na comarca de Vigo (1950-1962)

Despois da derrota do 36, o anarcosindicalismo tivo en Vigo un renacer a mediados dos anos 40, vertebrado a través das Mutualidades Obreiras e da actividade laboral con raigame nos grandes talleres e astaleiros que a represión se encargaría de silenciar nas décadas seguintes. Dentro dos aspectos máis salientábeis do libro, vemos outra faciana do movemento libertario no interior -en Galiza concretamente- que está moi alonxado do romanticismo da loita armada. Como sombras aparecen tanto sindicalistas, que dedicaban os seus días a gañárense a vida desempeñando oficios na industria local, como personaxes que máis tarde terán extensa cabida en páxinas de sucesos pero que antes dedicaron anos de enormes esforzos a manter unha certa unidade entre libertarios. Este traballo permite vislumbrar como se fraguaron aqueles acontecementos.

A organización, o enfoque sindical, a preparación e a extensión da conflitividade, non poden explicarse só coa calidade humana dos protagonistas, por certo algúns ao final da adolescencia. Neste caso, igual que durante a resistencia contra o levantamento militar de 1936, a oposición levárona a cabo homes movidos polas súas ideas, non pola singural combinación dos seus xenes, nin polos fíos férreos dun comité de notábeis. E todo dentro dunha carencia total de medios materiais.