Mapoulas, Sardiñas e Dinamita. Xeografía libertaria das Atochas - Monte Alto

Mapoulas, Sardiñas e Dinamita. Xeografía libertaria das Atochas - Monte Alto

A mediados do século XIX o barrio das Atochas pasou de ser unha pequena aldea extramuros a converterse nun dos primeiros barrios obreiros da Coruña. Porén non foi ata os anos 30 do século XX que o barrio pasou de ser un espazo residencial a ter un peso específico no movemento obreiro libertario da cidade. Ata entón moitas das veciñas do barrio formaban parte do proletariado militante, pero levaban a cabo a súa actividade sindical e cultural nos espazos centrais da cidade burguesa. Coa fundación de ateneos libertarios e centros culturais e deportivos obreiros, o barrio convertiuse en territorio de militancia, de produción de cultura obreira e de reprodución das ideas libertarias.

Mapoulas, Sardiñas e Dinamita é unha mirada sobre o barrio a través das lentes da historia e a memoria do movemento obreiro libertario. Unha descrición da xeografía das Atochas que conecta diferentes espazos e tempos co fío das iniciativas e experiencias anarquistas que no barrio foron. Unha (re)lectura do espazo urbano que aporta significados específicos a lugares concretos e permíte relacionarnos con eles doutro modo. Con isto o que se propón é reivindicar o valor histórico e memorialístico destes espazos e do patrimonio obreiro que aínda existe no barrio, materialmente degradado e ameazado pola presión dos intereses inmobiliarios; estimular o debate, a conversa e o diálogo sobre o pasado compartido do barrio; e traer ao presente algunhas destas experiencias e iniciativas anarquistas para dialogar con elas na construción dun futuro máis libre e xusto. Tamén é o seu propósito render unha modesta homenaxe ás xeracións que construíron social e materialmente o barrio, e que deron a vida para defendelo da barbarie fascista.